عم كيوبيد

تسللت سهام الهوى الطاغية  الى حجرته ليلا...لم يستطع سلطان نومه أن يصمد طويلا أمام قذفها المتواصل ..  ف استيقظ و تتبعها منصاعا ليقف أمام نافذته .. و لما صدرت  اوامرها بفتحها أنفتحت و كأنها لم تكن مغلقة .. و تجمد بصره على كيوبيد يصوب سهمه .. راقبت عيناه بريق السهم فى شد الوتر  .. و تسألت نفسه متى المنطلق .. و سادت لحظات صمت طويلة فاق طولها قمة صبره .. فقطعها بنبرة تحدى عنيدة و هو يكشف عن صدره  قائلا ... "اضرب .. أنا أهو .. أضرب  "

كيوبيد : طب أثبت يا عم و ماتتحركش يمين و شمال ألا السهم ييجى ف شيش الشوباك

هو : ( يحاول أن يستوعب ما يسمعه ... ثم يرفض عقله أن يقبله .. ثم ينظر بداخل غرفته لعله يصل لمصدر الصوت فلا يجد أحد .. يعاود النظر الى كيوبيد )  أضرب باقولك  .. أضرب

كيوبيد : طيب يا عم .. ماتستعجلنيش بقى ألا السهم يقع منى

هو : ( و قد تأكد من مصدر الصوت )  على مهلك حضرتك .. على مهلك .. بس بسرعة شوية

كيوبيد :  ح عد لغاية تلاتة و أضرب .. واحد .. اتنين .. ياعم ماتتحركش خلينى أخلص يوم بدرى بقى و أروح

هو : و المصحف ما اتحركت .. أنت اللى متوتر مش عارف ليه

كيوبيد : يا عم مانا عمال ألف من الصبح و طاير بجنحاتى زى ما أنت شايف كده  و مافيش أى تقدير

هو : طب معلش معلش .. أضربنى ا لسهم ده و روح على طول

كيوبيد : طب يلا .. واحد .. اتنين .. انا حاسس ان جناحاتى مش شيلانى و هقع .. مش قادر

هو : لأ لأ لأ .. تقع ايه  .. ده أنا ماصدقت ألاقيك .. طب تعالى ريح على سور الشباك شوية .. تعالى

كيوبيد : ( يحاول الطيران بصعوبة حتى يصل الى الشباك و ما يكاد يستقر عليه حتى يختل توازنه و يهم بالسقوط لولا صاحب الغرفة يجذبه اليه )  شفت .. كنت هقع

هو : ياسيدى خلاص حصل خير .. استريح أستريح .. خد نفسك

كيوبيد : (يحاول أخذ نفسه بصعوبة)  يقطع الحب و سنينه  

هو: معلش.. أستريح يا  كيوبيد

كيوبيد : كيوبيد ؟!

هو : أيوه مش حضرتك برضه كيوبيد ؟

كيوبيد : أنت تعرف ان انا اللى حببت روميو ف جوليت .. و قيس ف ليلى .. و الاميرة ديانا ف دودى  .. يعنى عمرى قد عمرك مية مرة و أكتر .. و ماينفعش تقولى كيوبيد حاف كده .. قولى يا عم كيوبيد

هو : أسف .. ماقصدش .. ماتزعلش يا عم كيوبيد .. كويس كده

كيوبيد : معقول

هو : طب يلا بقى قوم اضربنى السهم ف قلبى علشان أقع ف الحب لشوشتى

كيوبيد : طب يابنى سيبنى استريح شوية  .. مالحقتش أخد نفسى حتى

هو : لأ لأ .. يلا أضربنى الاول و ابقى استريح بعدين

كيوبيد : طب هات خمسين جنيه

هو : خمسين جنيه ؟! .. بتاعة ايه ؟!

كيوبيد :  تمن  السهم  اللى  هضربه ف قلب حضرتك ده.. و بعدين أديك شايف سهم و نبلة و جناحات و بطير .. يعنى صارف و مكلف .. و لا انتو عايزين تقعدوا تحبوا و تتحبوا ببلاش .. و لا عاوزينى انا بقى اصرف عليكوا .. و لو مش عاوز خلاص .. بلاها خالص .. أنا ماشى

هو : لألأ .. قلبك أبيض .. حالا تكون عندك الخمسين جنيه ( يهرول الى مكتب قريب منه و يفتح درجه .. ثم يدس بضعة أوراق مالية ف جيبه قبل ان يخرج من بينها خمسين جنيه و يتجه بها الى كيوبيد الذى مازال جالسا على الشباك) .. أتفضل .. يلا أضرب بقى

كيوبيد : ( يعتدل ف جلسته و يستدير  على الشباك لتصبح قدميه داخل الغرفة )  طب يلا روح أقف ف أخر الاوضة علشان أضرب السهم ف قلبك

هو: (يتجه لأخر الغرفة و يفتح ذراعيه  و اسارير الفرحة تغطى وجهه) يلا .. أضرب

كيوبيد :( يشد السهم و يصوبه اليه ) .. أسمك "كريم" .. مش كده ؟

كريم : أيوة .. عرفت أسمى ازاى ؟

كيوبيد : ( مازال ممسك بالسهم و يصوبه) .. كل سهم عندى بيبقى مكتوب عليه اسامى الحبيبين .. كريم و سهى  ( ثم يطلق السهم صوب  قلب كريم  )

كريم : ( يهم أن ينطق بالكلام أو ان يتفادى السهم و لكن كان السهم أسبق من كلاهما .. أصاب قلب كريم مباشرة ثم تلاشى كأنه غبار .. جحظت عينا كريم و مسك صدره بيديه كمن تلقى رصاصة به .. ثم جثى على ركبتيه و نظر الى كيوبيد و هو يشير برأسه بالنفى)

كيوبيد : ايه يا عم .. أنت بتعمل كده ليه ؟ .. هو أنا ضربتك برصاصة .. ده سهم حب .. قوم ماتوهمش نفسك .. أنت مبحلق كده ليه

كريم : ( كمن يحاول التغلب على صاعقة أصابته) ..  نهى .. مش سهى

كيوبيد : هى مين ؟

كريم : البنت اللى أعرفها و نفسى أحبها و تحبنى أسمها نهى .. أنا ماعرفش أى حد أسمه سهى

كيوبيد :  ماقلتش ليه قبل ما اضرب السهم طاه .. هى بنات الناس لعبة ؟!

*************************************

جلس كيوبيد على سرير كريم جلسة القرفصاء .. و ظل كريم يجوب الغرفة أمامه ذهابا و ايابا ف عصبية  و يضرب بضمة أحدى يديه  كف الاخرى و يردد : أعمل ايه بس دلوقتى؟ .. أعمل ايه؟ .. اعمل ايه ؟

كيوبيد :( موجها كلامه ل كريم) : دى غلطة البت سمسمة

كريم : ( يتوقف عن الحركة و يشير الى كيوبيد ف عصبية) مين سمسمة دى ؟

كيوبيد: دى البت اللى قاعدة على السويتش تاخد اوردرات الحبيبة .. من ساعة ما استلمت و هى  غلطاتها كتيرة و ملخبطة الناس فى بعضها كده

كريم : أه .. و الست سمسمة دى  راحت ملبسانى ف واحدة و لا عمرى سمعت عنها قبل كده  .. سهى .. مين سهى دى ؟ ..معرفش!

كيوبيد : طب ده كويس قوى انها غلطت ف حرف واحد .. أحمد ربنا

كريم : هتفرق ف ايه حرف و لا حرفين .. أهى واحدة تانية و السلام  .. و لا كانت هتجيبلى عواطف بدل نهى؟

كيوبيد:  طب بالك أنت قصص الحب اللى بتحصل اليومين دول   بين بنت مسيحية و ولد مسلم  او العكس و يهربو مع بعض و يعمللكوا فتنة طائفية ف البلد .. سمسمة هى اللى بتبقى مطلعة اوردرادهم

كريم : بقولك ايه يا راجل انت .. انا ماليش دعوة بالكلام ده .. أنت زى ما رمتنى بالسهم ده لازم تخرجه .. و الا هتشوف منى الوش التانى يا كيوبيد

كيوبيد :  كيوبيد؟! .. أنت تعرف ان انا اللى حببت روميو ف جوليت .. و قيس ف ليلى .. و الاميرة ديانا ف دودى  .. يعنى عمرى قد عمرك مية مرة و أكتر .. و ماينفعش تقولى كيوبيد حاف كده .. قولى يا عم كيوبيد

كريم : يا عم كيوبيد .. يا كيوبيد باشا بيه .. لو سمحت من فضلك .. هاتلى حل للمشكلة اللى أنت حاططنى فيها دى .. و دلوقتى حالا

كيوبيد : خلاص أنا هكتبلك شكوى باسمك و ارفعها للادارة .. انا هخليهم يرفدولك سمسمة دى

كريم : و انا هستفيد ايه ساعتها .. أنا عايز حل لمشكلتى أنا

كيوبيد : طب ادى البنت فرصة  الاول

كريم : سمسمة ؟

كيوبيد : لأ .. سهى

كريم : ماتجبليش سيرتها يا كيوب...قصدى  يا عم كيوبيد

كيوبيد: مش يمكن تطلع كويسة ؟

كريم :يا سيدى كويسة ربنا يوفقها .. وحشة ربنا يهديها .. أنا عاوز نهى ..

كيوبيد : ولما أنت متمسك ب نهى قوى كده .. ما صارحتهاش بحبك من الاول ليه .. ايه اللى خلاك تستنى السهم

كريم : (يتلعثم ف الرد كمن يبحث عن اجابة لم تكن حاضرة ) كنت.. كنت .. كنت مستنى الوقت المناسب

كيوبيد : شوف يا ابنى الحب الحقيقى مايعرفش الحجج الفاضية دى

كريم : هاديلك مية جنيه و تشيل تأثير السهم زى ما حطيته

كيوبيد : مممم .. طب هى فين المية جنيه

كريم : ( يخرج ما فى جيبه من نقود و يجمعهم  حتى يصل للمية جنيه و يضعها فى يد كيوبيد) يلا .. و ركز بقى المرة دى

كيوبيد : (يدس يده الاخرى ف جيبه و يخرج الخمسين جنيه و يشير بها الى كريم و يقول) لو انت لسة  بتدور على حب حقيقى بصحيح .. يبقى مكنش ينفع  تشتريه ب دى ... ( ثم يشير اليه بالمائة و يقول ) اما لو انت حبيت بجد و دوقت  طعمه .. ماينفعش تشيله ب دى .. (ثم يضع النقود كلها ف يد كريم و يقول )  .. دول مش ممكن يأثروا فى حب حقيقى

كريم : ( يحاول ان يستوعب رسالة كيوبيد ثم تأخذه العزة بالاثم  ليصيح فى وجه كيوبيد) .. أنت كداب و حرامى و نصاب يا كيوبيد

كيوبيد : ( يبتسم ف هدوء) ممكن أسمحلك تقول عليا كداب لأنى قولتلك الحقيقة اللى كانت موجودة قدام عينيك طول الوقت و أنت مش عاوز تصدقها .. و ممكن أسمحلك تقول عليا حرامى لأنى سرقت منك عكاز الامل اللى ب يتسند عليه كل نص عاشق  فى سكة الانتظار .. و هسمحلك كمان تقول عليا نصاب لانى استغلت ضعف هواك و خوفك علشان أ كشفك قدام نفسك .. لكن اللى مش ممكن أسمحلك بيه أبدا .. أنك تقول عليا  "كيوبيد"  حاف كده..  أنت عارف ان انا اللى حببت روميو ف جوليت .. و قيس ف ليلى .. و الاميرة ديانا ف دودى  .. يعنى عمرى قد عمرك مية مرة و أكتر .. و ماينفعش تقولى كيوبيد حاف كده .. قولى يا عم كيوبيد

كريم : عم كيوبيد .. أخرج بره

كيوبيد : طب ماتخلينى بايت معاك للصبح ..  الوقت أتأخر .. الصباح رباح 

كريم : بره يا عم كيوبيد

كيوبيد : ( يومأ رأسه بالايجاب و يتجه الى الشباك و يستعد للطيران .. و يوقفه صوت كريم ينادى عليه .. فيلتفت اليه برأسه دون أن يغير اتجاه جسده)

كريم : روميو أنتحر ... و قيس أتجنن  ... و دودى أتقتل

كيوبيد : بس ماحدش فيهم عاش كاتم حبه جواه ( قالها و انطلق محلقا)