هو : جوجل ؟
محسن : أيوة
هو : ألو .. ألو .. مين معايا ؟
محسن : معاك محسن من جوجل
هو : ألو .. لأ حضرتك بتهزر .. مين معايا ؟
محسن : يا فندم أنا محسن من جوجل و مش بهزر .. مش حضرتك دخلت ع النت من الموبايل و شغلت ال اوديو سيرش و قلت "جوجل"
هو : أه.. فعلا.. حصل
محسن : جوجل بقى قررت بدل ما ترد على حضرتك بصفحة ويب .. ح ترد على حضرتك بصوت أوديو .. جزء من الذكاء الاصطناعى سيادتك
هو: ألو .. يعنى أنت رسالة مسجلة دلوقت ؟
محسن : رسالة مسجلة إزاى و أنا عمال أرد عليك يعنى ؟! .. بص .. حضرتك تقدر تعتبرنى أنسان ألى أسمه محسن
هو : يا سلاااام ! .. طب بقولك ايه .. هى الدقيقة لغاية عندكم بكام ؟ .. لحسن تخلصولى الباقة
محسن : دقيقة أيه؟ .. أنت أصلا بتكلمنا على الانترنت .. و بطل كلمة "ألو" دى .. حضرتك أعتبر نفسك على صفحة جوجل الرئيسية عادى خالص .. ها ؟ .. تحب تسيرش عن ايه ؟
هو : لأ لسة مش عارف .. أستنى ح أفكر
محسن : خد وقتك يا فندم .. .. .. , و أنت بتفكر أحب أفكر حضرتك إن النهارده الذكرة السنوية لميلاد السيدة "لطفية النادى"
هو : اه اه عارفها ..اللى هى كانت عاملة "لويزا" فى فيلم "الناظر"
محسن : أولا الفيلم اللى فيه "لويزا" ده كان أسمه "الناصر صلاح الدين" مش " الناظر" .. و بعدين اللى كانت عاملة "لويزا" كانت " نادية لطفى " .. ودى أساسا مالها ش أى علاقة ب " لطفية النادى " .. لطفية النادى دى أول ست مصرية تبقى كابتن طيار .. هى أساسا مواليد ..
هو : بس بس بس .. أنت ح تقلب دماغى ليه ؟ .. مش عاوز أعرف
محسن : ماشى ب راحتك .. ها بقى؟ .. عايز تسيرش على ايه ؟!
هو : ما أنت قطعت حبل تفكيرى .. ينفع أقفل دلوقتى و أرجع أتصل بيك لما أخلص تفكير
محسن : لو قفلت السيشن دلوقتى و رجعت فتحت سيشن جديدة ح يرد عليك حد من زمايلى و ح يبدأ معاك م الأول .
هو : انتوا كذا واحد بقى
محسن : أنا و عاطف و أمير وسامى.. و السوبرفيزور بتاعنا ذكريا
هو : كلكم رجالة كدة .. جوجل مش عاملين انسانيات اليات و لا ايه ؟
محسن : البنات مابيخدوش سيشين جاية من "مصر" حضرتك
هو : ليه بقى إن شاء الله ؟!
محسن : من قلة الأدب اللى بنشوفها و الله يعنى .. تلاقى البنية نازلة الشفت تاكل لقمة عيش ب الحلال .. وتلاقى بقى المعاكسات و الاستظراف و الاستهبال شغال .. أنا ممكن اجيب لحضرتك نتايج السيرش عن التحرش ف مصر.. أو اضطهاد المرأة.. أو سوء المع...
هو : بس بس بس .. أنت مابتصدق تشبك ف أى موضوع و خلاص ... عايز تجيبلى أى سيرش و تخلع .. بص.. أنا اللى فاتح النت و انا اللى ح أختار حاجة على مزاجى أسيرش عليها
محسن :براحتك يا فندم .. أنا بس كنت ب أحاول أساعد حضرتك .. يعنى حضرتك كنت داخل على جوجل ليه أصلا
هو : و الله يا محسن .. أسمحلى أقولك محسن عادى يعنى .. أنا كنت زهقان كده فقولت أدخل أشوف حاجة تفرفش الواحد كده شوية و تغير الموود
محسن : أجيب لحضرتك فيديوهات ب تضحك من ع اليوتيوب ؟
هو : شوفتهم كلهم
محسن :ألعاب ذكاء ؟
هو : مابكرهش حاجة ف حياتى قد الذكاء .. لامؤاخذة يعنى يا محسن .. أنا عارف ان دول ممكن يكونوا قرايبك و كده .. بس الصراحة مافيش أحسن منها
محسن : طب فيه جروب ع الفيسبوك بيعمل رحلات سفارى بأسعار كويسة
هو : أيوة .. حلو ده .. بس لأ لأ .. الواحد مكسل كده و جسمه كله مهمد .. و مش ح ينفع سفارى و مرمطة .. دى الصحة حتى ف النازل
محسن : بسسسس .. يبقى أنت عايز حاجة كده تحركك و تنشطك و تخلى الدم يجرى ف عروقك
هو : برنس ياض يا محسن و المصحف
محسن : يبقى أحنا نقطع الورقة اللى فيها نتايج سيرش كسر الملل دى و نرميها .. و نطلع ورقة سيرش جديدة .. وندور ع النشاط و الحركة
هو : أيوة بقى
محسن : الجيم اللى جنب بيتكم .. مرة واحدة ف الاسبوع ... ب 200 جنيه ف الشهر
هو : كتيير يا محسن .. مرة كل أسبوع كتيير .. مش علشان ربنا مدينا صحة نقوم نفترى
محسن : كايرو رانرز بكرة الصبح الساعة 7
هو : حر يا محسن ... حر
محسن :كريزى واتر بكرة الساعة 11
هو : برد يا محسن .. برد
محسن : حضرتك حيرتنى الحقيقة .. ماهو لازم تبذل مجهود بدنى علشان حالتك تتحسن شوية
هو : مش شرط .. أحنا ممكن نكسر الملل ده ب أى حاجة معنوية كده .. القلب لو فرح يا محسن .. الصحة ح ترد فى الجسم كله
محسن :فهمت .. يبقى نقطع الورقة اللى فيها نتايج سيرش النشاط دى و نرميها .. و نطلع ورقة سيرش جديدة .. وندور ع القلب و الحب
هو : أنت أنسان ألى حساس و بتفهم يا محسن .. إدينى
محسن : النتايج كلها ب تقترح أن حضرتك ترتبط .. الجى ميل عندنا بيرشح "هدى" اللى ب تقعدوا تتشاتوا مع بعض كل يوم بعد الساعة 12 بالليل .. و الفيسبوك بيرشح "منى" اللى كل خروجاتك و صورك معاها .. و ال فون لوجز ب ترشح "شيماء" اللى مخلص عليها نص رصيدك .. و اليوتيوب بيرشح جنات بتاع حب جامد اللى بتسمعها كتير
هو : جنات ؟! .. مستحيل طبعا
محسن : الحب مافيهوش مستحيل .. أنت فاتحها فى الموضوع و شوف هى رأيها ايه
هو : أكيد ح ترفض يا محسن
محسن : الندم اللى ح تندمه لما ترفضك أقل بكتييير من اللى ح تندمه لو ماصارحتهاش بحبك
هو : نسبة نجاحى فى حاجة زى كدة معدومة تقريبا
محسن :أحنا ممكن نحسبها .. هى معجبينها حوالى ننننن ووون .. و أنت معاك حاجة و حتيين .. يبقى نسبة نجاحك صفرين .. خمس تصفار .. تسعة .. 12 صفر علامة واحد .. نقسم الرقم ده بقى على ننيين مليون فى مصر .. و نننوون السعودية .. و ننيين الخليج .. و 3 تنفار ف قطر .. و فيه هناك....
هو : ها ... طمنى
محسن : عيب عليك .. زى ماقلتلك .. يا هدى يا منى يا شيماء
هو : لأ .. مش نافع يا محسن .. مش نافع .. و مش الارتباط اللى ح يحسن الموود لأ .. أنا كنت أقصد فرح القلب كده .. يعنى حاجة روحانيات .. عندك روحانيات يا محسن ؟
محسن : بتاعتى .. أنا أساسا تخصص روحانيات
هو : و ساكت م الصبح .. خش عليا
محسن : بس أنت متأكد إن هى دى الحاجة اللى أنت عاوزها ؟! .. علشان ما تدوخنيش ع الفاضى
هو : إلا متأكد .. طب تصدق ب إيه .. أنا الموود عندى بدأ يتعدل من قبل أعرف نتايج السيرش
محسن : ح نشوف .. يبقى نقطع الورقة اللى فيها نتايج سيرش الحب دى و نرميها .. و نطلع ورقة سيرش جديدة .. وندور ع روحانيات .. يا مسهل
هو : قول يا محسن قول .. قسم و سمعنى
محسن : تأملات كونية فى مجرة درب التبانة .. ها أيه رأيك ؟
هو : أنا مش ح أقولك إنى مافهمتش الجملة فى حد ذاتها .. أنا مافهمتش كل كلمة فيها ...لأ لأ لأ .. أنت روحت ل روحانيات تانية خالص .. بص .. سيرش على إيمانيات كده
محسن : و لو سألتك متأكد ح تقولى طبعا .. طب بص بقى دى من غير سيرش كده .. مبدأيا أحنا نشغل فى الباك جروند أغنية نور على نور بتاعة عمرو دياب .. و لو أنت مسلم أنزل من بيتك و أمشى 100 متر يمين ح تلاقى جامع خش صلى مع اللى جوة .. لو مسيحى أنزل من بيتك و أمشى 100 متر شمال ح تلاقى كنيسة خش رتل مع اللى جوة .. لو يهودى أنزل من بيتكم و خد مواصلة لحد معبد القرائين ف العباسية و خش تعبد مع اللى جوة ..و لو ملحد يا سيدى خليك قاعد ف بيتكم و تأمل عنكبوت سقف الصندلة اللى كان ممكن يطلع أنسان زيه زيك.. بس مكتب التنسيق فى السلسة الوراثية ماساعدهوش.. و سعافة التنضيف ما طالتهوش .. ففضل كده متشعلق لا طايل سما ولا أرض .. وساعتها بقى ح نطفى عمر دياب و نشغل " ده العمر قصير ليه نتحير.. ولا .. و لا مانعشهاش .. بقى كم شالوا هم وحرقة دم .. يا عيني راحوا بلاش ... تلا لا تلا لا لا لا لا رامى عيااااش "
هو : أنت بتتريق عليا يا محسن ؟! .. تصدق أنا قفلت خالص بقى
محسن : اه ب اتريق بصراحة .. حضرتك مطلع عينى م الصبح و أنت أصلا مش عارف أنت عاوز ايه
هو : أومال انتو فايدتكم ايه بقى ؟
محسن : أحنا سيرش انجين .. يعنى لو أنت عايز تعمل حاجة معينة و مش عارف ب تتعمل إزاى .. أحنا ممكن نقولك ب تتعمل إزاى ... انما لو حضرتك أصلا مش عارف أنت عاوز ايه .. ف بالتالى حضرتك مش ح تبقى عارف أنت المفروض تسيرش عندنا على ايه ..و علشان كده لا جوجل.. ولا الاب توب اللى مع حضرتك ده .. ولا النت كله ح يقدر يساعدك .. ح يبقى كأنك بالظبط واقف فى متاهة .. المتاهة فى حد ذاتها مش مشكلة .. المشكلة إن حضرتك مش عارف عايز تروح فين .. وساعتها ح تبقى كل الطرق الموجودة ف المتاهة ب توصلك ل نهايات مسدودة .. و علشان تخرج من المتاهة دى محتاج أولا .. أنك تدرك أصلا إنك واقف فى متاهة .. و تبطل تعاند و تكابر و تدعى إنك عارف أنت عاوز ايه .. علشان ما تفضلش تجرى فى كل طريق شوية و تضيع وقتك و مجهودك و فى الأخر تكتشف إن ده مش الطريق اللى أنت عاوزه .. و ثانيا .. محتاج تقعد مع نفسك قعدة مصارحة .. و تسيرش جواها هى الاول .. شوف هى عاوزة ايه .. و تتأكد أنها مستعدة تبذل مجهود علشان توصل للى هى عاوزاه ده .. ساعتها بس ممكن تبدأ تتحرك من مكانك ف المتاهة .. لأن ساعتها بس ح يبقى عندك طريق للخروج
هو : ألو!! .. محسن ؟! .. هو فيه حد تانى معاك ع الخط ؟!
محسن : حد تانى إيه و خط إيه بس ؟ .. أنا كنت بكلمك أنت
هو : لأ يا عم أنا عارف أنا عاوز ايه
محسن : لأ مش عارف
هو : لأ عارف .. و أنا اللى فاتح النت .. و أسيرش بمزاجى بقى.. هه
محسن : كده؟ .. ماشى .. بس ده أخر سيرش ح أعملهولك .. و لو مارجعش اللى أنت عايزه .. أنا ح أقفل السيشن دى من عندى .. أتفضل ..قولى اسيرش على ايه ؟
هو: بص يا سيدى .. سيرش على ... سيرش على ... بسم الله الرحمن الرحيم ...
محسن : النتايج كتيرة المرة دى ..فيه فوايد البسملة و تفسير البسملة و خواص ال...
هو: أنت بتعمل إيه؟ .. أنا بسمى بس .. ما أقولتلكش سيرش .. مش ح تتحسب طبعا .. لسة لية مرة أخيرة
محسن : و بعدين بقى اااا .. طيب .. .. يبقى نقطع الورقة اللى فيها نتايج سيرش البسملة دى و نرميها .. و نطلع ...
هو : أوعى ترميها .. دى لازم تتحرق علشان فيها البسملة .. ده أنت لو رمتها تتسخط قرد
محسن : أتسخط قرد إزاى يعنى ؟؟!! .. أنا أصلا أنسان ألى
هو : ح تتسخط قرد ألى .. ده أنت مخيلتك ضيقة قوى يا محسن
محسن : عندك حق .. أنا غلطان يا سيدى .. أنا ح أشيل الورقة ف جيبى و ح أبقى أحرقها بعدين .. قولى على أخر سيرش ليك بقى و ماتقعدش تتحجج و تضيع فى الوقت ... المفروض أنك عارف عايز تسيرش على إيه
هو : أه طبعا عارف .. أومال مش عارف .. سيرش على ...سيرش على ... بس أنا عايز أقولك على حاجة .. أنت ممكن ماتحرقش الورقة كلها .. أنت تقطع الحتة اللى مكتوب فيها البسملة و تروح ...
محسن : ياعم أنا مش ح أحرقها خالص أنا ح أفضل شايلها ف جيبى كده طول عمرى .. بلاش تضييع وقت و قولى ح اتسيرش على ايه بقى
هو: أه طبعا ح أقولك .. أومال مش ح أقولك .. سيرش يا سيدى على ..على .. الورقة ف جيبك كده مش أمان .. أمك ممكن تاخد الهدوم تغسلها الجمعة الصبح و أنت تكون نايم
محسن : يأخى باقولك إنسان ألى بقى .. ألى .. تقولى أمك و الغسيل ! ... قولى أخر سيرش ليك بقى .. أنت طهقت الواحد
هو : ماشى يا عم محسن .. ماشى .. بس على فكرة أنت نرفوز و خلقك ضيق ..و الكلام أخد و عطا يعنى .. هو أنت ابن سبعة ؟
محسن : مالكش دعوة ابن سبعة ولا ابن سبعين .. أخر ورقة سيرش ليك عندى أهيه .. أكتب أيه ف السيرش ؟ .. ركز
هو : أكتب عندك يا سيدى .. من أول السطر و حسن خطك
محسن : أنجززز
هو : أكتب .. " هو أنا عاوز ايه بالظبط .. مسافة .. علامة أستفهام " .. و لافينى بقى بالنتايج
محسن : دربجن ... بوووووم ... زززز .. بووم .. بوووووووم .. فششششششششششش
