المواطن مصرى 7

على صفحة من صفحات الفيس بوك..أتجه السهم البيض الى اليسار ليشير الى صورة كتب بجوارها " المواطن مصرى" و بالضغط عليها تم فتح إحدى نوافذ الشات ذو المستطيل الأزرق العلوى.. وتم كتابة  عبارة " أنت هنا "   في خلفية زرقاء مستطيلة 
 مرت عدة ثوانى دون تلقى أى رد .. ثم جاءت عبارة أخرى فى نفس الخلفية الزرقاء من نفس الراسل     " أنا عارفة أنك اون لاين .. رد يا مواطن  " 

جاء الرد  هذه المرة فى خلفية رمادية من الطرف الأخر  "أنا اوف لاين يا حياة "

حياة : أوف لاين إزاى ما أنت ب ترد عليا أهو ؟ّ!

المواطن : ياستى فيه أختراع أسمه "  سيين"  ..  لو بصيتى عليه هتلاقينى لسة ما قرتش  رسايلك 

حياة : و الله ؟!

المواطن : طبعا .. لو مش مصدقانى أسألى مارك و لا الفيس بوك كله بقى متأمر عليكى .. لو سمحتى بقى سيبينى دلوقتى أعيش الاوف لاين مود .. و أنا أوعدك أول ما هبقى أون لاين هارد عليكى 

حياة : أسيبك تعيش الأوف لاين ؟! .. ولا أسيبك تكمل اللايكات و الكومنتات اللى النيوز تيكر اللى ع اليمين عندى ح يفرقع منها؟!

المواطن : إيه ده ؟! .. هو أنا ظاهر عندك ف النيوز تيكر ؟! 

حياة : ده مافيش غيرك فيه يا حبيبى ... .. لو مش مصدقنى أسأل مارك و لا الفيس بوك كله بقى متأمر عليك؟!

المواطن : أنت إش فاهمك أنتى بس ف الفيس بوك  .. أنتى لسة عاملى أكونت أول امبارح  .. بس أنا كنت  قافل حتة النيوز تيكر دى 

حياة : معلش أصلك لسة جديد و بتتعلم

المواطن : مين ده اللى جديد يا حياة ؟ .. أنا يا ماما عامل أكونت من 2007 .. يعنى بقالى أكتر من 40 سنة ع الفيس بوك 

حياة : طب و مش عيب عليك ؟!

المواطن : صحيح عيب على الخبرة تفوتنى حكاية النيوز تيكر  دى 

حياة : أنا قصدى عيب ع الشيبة .. واحد عدى الستين زيك .. يقوم يصلى له ركعتين و لا يقرا شوية  قرأن .. ده أنت يلا حسن الختام .. مش قاعد ت كومنت و تلايك .. حاجة هزؤ

المواطن : هزؤ ! .. لأ .. أحترمى نفسك يا حياة .. أنا ما بعملش حاجة غلط 

حياة :غلط؟ .. لأ العفو .. و تطلع مين وفاء دى كمان إن شاء الله 

المواطن : وفاء؟!! .. وفاء مين؟! .. أنا معرفش أوفياء غيرك 

حياة : و النبى أيه ؟! .. وفاء اللى جنابك نازل على الول بتاعتها كومنتات و لايكات م الصبح 

المواطن : أااه .. هى دى  أسمها وفاء؟

حياة : لأ .. أسمها أستعباط  

المواطن : و بعدين بقى ؟! .. أنا ماعرفهاش .. هى لسة باعتالى ريكوست النهاردة .. و أنا لاقيتك  عدو مشتر ... قصدى صديق  مشترك .. ف قبلت طلبها

حياة : قبلت طلبها النهاردة بس و قاعدين ع الشات بقالكوا أكتر من ساعة .. أومال لو كنتو أصحاب من زمان كنتو ا  عملتو إيه ؟

المواطن : يا ستى ماتبقيش ظنانة و بعدين ...

المواطن : ثانية واحدة .. أنتى عرفتى منين أننا بنتشات بقالنا أكتر من ساعة ؟

حياة : أأأأاااااا ..ماهووو .. بص .. ما تغيرش الموضوع 

المواطن : حياة .. عرفتى منين موضوع الشاتينج ده ؟؟

حياة :( مارك) الله يباركله  شدلى تلغراف ب يفطمنى فيه على كل حاجة .. قالى جوزك يا حياة .. جوزك أبو عيالك .. جوزك اللى أنتى قايدة له صوابعك العشرة شمع و تتمنيه له الرضا يرضا  .. قاعد بقاله أكتر من ساعة  يشات مع واحدة ضفرك برقبتها 

المواطن : مش ح تبطلى الداء اللى فيكى ده يا حياة  ... لعلمك بقى وفاء دى أحسن منك 

حياة: بقى كده يا مواطن 

المواطن : مش كده و بس .. و فاء دى مافيهاش كل عيوبك .. الشك و الغيرة و العصبية

حياة : طب عاوزة أقولك على حاجة بقى على فكرة 

المواطن : عارف .. أنتى وفاء

حياة : يعنى كنت عارف م الأول و سايبنى كل ده 

المواطن : داخلة على بروفيلك م الاب توب .. و عاملة فيها وفاء م الموبايل ...  فيه واحدة ف الدنيا تعمل بروفيلها النهارده الصبح و تضيفك انت بس .. و بعدها على طول  تبعتلى ريكوست .. طب أحبكيها طيب 

حياة : يوووه مانا غيرت أسمى .. طب بزمتك..  أنا حد قالى ( وفاء ) ده قبل كده ؟ 

المواطن : و بعدين ايه الصورة اللى انتى حاطاها ل وفاء دى ؟  ... حاطالها صورة الخلفية بتاعة الويندوز ؟! 

حياة : أهى الصورة اللى كانت قريبة من ايدى ساعتها بقى 

المواطن : و مش مكملة بروفيلها .. لا انا عارف خريجة ايه ولا شغالة فين و لا اى حاجة عنها

حياة : وأنت  بقى ان شاء الله بقيت مهتم بيها قوى كدة ليه ؟ 

المواطن : الله ! .. مش صديقة الكترونية .. لازم اهتم بيها طبعا

حياة : خلاص المرة الجاية ان شاء الله هبقى ابعتلك السى فى بتاعها .. و علشان تعجب سيادتك ح ابقى احطلها صورة  "مادلين مونرو" 

المواطن : مادلين ؟! .. طب هو بغض النظر عن "مادلين" دى .. و بغض النظر برضه عن كل اللى فات ده.. ببساطة كده .. إميلها ع البروفايل " HayatElmasry88 " .. ده نفس ميلك يا حياة


حياة : لأ طبعا .. انا ات " جى ميل" .. هى هوت ميل .. انت فاكرنى عبيطة علشان اعمله بنفس الميل 

المواطن : مش ح تعقلى بقى يا حياة ؟

حياة : ماهو من زهقى يا مواطن .. عاجبك قعدتى كده مابين اربع حيطان من يوم  ما سيبتنى؟ 

المواطن : ده أنا قولت تلاقيك فرحانة إنى روحت .. بتاخدى السرير كله لحسابك .. و ماحدش بيشد من عليك الغطا .. ومافيش صوت شخيير 

حياة : صوت شخيرك ده كانت الحاجة الوحيدة اللى بتطمنى و أنا نايمة .. هو ليه الواحد مابيقدرش النعمة اللى بين ايديه غير لما تروح منه ؟ 

المواطن : ده أمر ربنا يا حياة .. و أنتى ست مؤمنة و عارفة كويس أننا مالناش يد ف أعمارنا .. الأعمار بيد الله

حياة : و نعم بالله .. وحشتنى يا مواطن  

المواطن : ما أحنا متفقين م الاول إن فيه واحد فينا ح يسبق .. والتانى ح يفضل علشان يدعيله ..  بتدعيلى يا حياة ؟

حياة : ف كل ساعة 

المواطن : بتوهبيلى قراية قرأن 

حياة : جزء كل يوم 

المواطن : بتوهبيلى صلاة ؟

حياة : بصليلك كل فرض .. بس وأنا قاعدة ع الكرسى .. ركبى مابقيتش تستحمل أصلى لية و ليك 

المواطن : طب ما تصليلى أنا صلاة كاملة قومى و اركعى و اسجدى .. و صلى لنفسك و أنتى قاعدة

حياة: يا راجل خلى عندك شوية دم .. شوية ذوق .. حبة إحساس

المواطن : العيال ب يسألوا عليكى؟

حياة : أهم .. بيتصلوا كل يوم ب التليفون .. و بيجونى كل جمعة 

المواطن :الواحد ب يحمد ربنا إن هو اللى سبق ..أكيد  الوحدة  صعبة مش  كده ؟

حياة: النهار زى الليل و الليل زى النهار .. عقارب الساعة معاندانى .. مش راضية تتحرك .. أنا باشتريلها بطاريات جديدة كل يوم .. و برضه مافيش فايدة .. و الملل بيحاوطنى من كل مكان ...  مافيش غير أنى أجيب كل يوم الاب توب بتاعى و أدخل ع الفيس بوك .. و أجيب الاب توب بتاعك و أدخل ع الأكونت بتاعك .. و أفضل أكتب هنا شوية و هنا شوية .. عاملة نفسى بكلمك و ب تشات معاك .. قال يعنى أنت موجود

المواطن : و بعدييين .. مأنا فعلا موجود أهو .. أنتى عارفة كل ردودى  و بتكتبيها ب النيابة عنى .... يبقى ليه الدموع دى دلوقتى ؟

حياة : أنت المفروض ماتعرفش إنى ب اعيط .. لأن أحنا بنتشات بس .. ماتخرجنيش من المود بقى يا أخى 

المواطن : يا سلاااام .. هى دى اللى أنتى مستغرباها قوى! .. يا حياة أنتى مصاحية واحد ميت و شبع موت ومداخلاه ع النت علشان تعملى معاه تشات .. و أساسا أنتى اللى بتكتبى ف الناحيتين  .. ركزى أنتى شوية 

حياة : أنا ب أضحك على نفسى يا مواطن ..بقعد أخترع حكايات و شخصيات .. بحاول أفرح.. أزعل .. احب و أغيير ..  بحاول  أغضب و أرجع أهدى  .. كمية الأنفعالات و المشاعر دى هى اللى بتحسسنى أنى لسة عايشة ...    أنا حاسة أنى اتجننت

المواطن : أنتى ست العاقلين

حياة :  أنا كده كده كلها شوية و ح أجيلك .. دى الحاجة الوحيدة الأكيدة

المواطن : هاتى معاكى زاد ليا و ليكى

حياة : طب يلا روح بقى علشان ألحق أنام و أقوم للفجر 

المواطن : طب أبقى صليلى صلاة كاملة  ف الفجر .. دول هما ركعتين

حياة : المهم ربنا يقبل يا مواطن .. المهم ربنا يقبل